Музејот на Македонија, кој се наоѓа под Скопското кале, е музејска установа составена од повеќе одделенија: Етнолошко одделение, Историско одделение и Одделението за уметност.

Основни дејности на музејот се истражување, прибирање, документација, презентација и публикување на музејски материјал од соодветните области. Во рамките на музејот делуваат и лабораторијата за конзервација, секторот за едукација, како и одделението за маркетинг, чии активности се изработка и пласман на комерцијални копии од најзначајните музејски експонати.

Историската поставка ја претставува духовната, културната и политичката историја од османскиот период, до крајот на Втората светска војна и повоениот период. Во рамките на историската поставка е презентирана и постојаната изложба „Македонците бегалци од Втората светска војна и граѓанската војна во Грција“.

Во Галеријата на икони се изложени најзначајните икони, иконостаси и фрескоживопис од повизантискиот период и од периодот на преродбата. Истата во моментов е во реконструкција.

Етнолошкото одделение ги презентира тематските целини од: народните носии и накитот, традиционалната архитектура, обичаите, музичките инструменти, народните ткаеници и покуќнината, како и занаетите и народното стопанство.

Во рамкте на музејскиот комплекс се наоѓа и културно-историскиот споменик Куршумли ан.