Сашо Димоски (Охрид, 1985, доктор по драмски уметности на ФДУ, УКИМ, Скопје) е македонски писател, драмски уметник и универзитетски професор. Неговото уникатно портфорлио, реализирано во книжевноста, драмата и балетот, обединува преку педесет наслови, на неколку јазици. Автор е на прозите: „Дневникот на Хулиганот“, „Алма Малер“, „Петтото годишно време“ и „Заспаните убавици“. Ги потпишува книгите собрани авторкски драми „Ние, Другите“ и „Текстови за сценска изведба“, книгата театролошки есеи „8/4“, а ја приредил тритомната хрестоматија „Нова античка драма“. Преведен е на англиски, српски, бугарски, албански и унгарски јазик, а негови раскази, драми, есеи и театролошки студии се дел од различни хрестоматии и списанија дома и во странство.

Покрај македонските продукции во драмата и балетот, соработува со значајни театарски куќи во Р. Србија, Р. Бугарија, Р. Хрватска и Р. Унгарија, потпишувајќи преку триесет продукции како драматург и автор на текст, соработувајќи со исклучителни режисери, кореографи и ансамбли.

Се издвојуваат праизведбите: „Дневникот на Хулиганот“ (НОБ, Скопје), „Алма Малер“ (МНТ, Скопје), „Федра“ (НТ Џинот, Велес/МГЛ, Љубљана), „Медеја“ (ИФАД Стоби, Велес, меѓународна копродукција), „Ана Комнена“ (НТ Џинот, Велес), „Госпоѓиците од Авињон“ (МНТ/НОБ), „Петтото годишно време“ (НТ Џинот, Велес), „Парламентарки“ (НТ Охрид/НТ Ниш), „Кралските копилиња“ (НТ Џинот, Велес), „Црвената соба“ (балетско либрето, НОБ), „Уберманш“ (Драмски театар Варна, Р. Бугарија), „Херои 04:33“ (театарска инсталација, НТ Џинот, Велес), „Петофи во Ченгер“ (Ченгер, Р. Унгарија) и други. Ги потпишува драматургиите на претставите „Дервишот и смртта“ (балетска драматургија, ХНК Сплит), Р. Хрватска, „Декамерон“ (соработник, НТ Ниш/НП Нови Сад), „Инферно“ (НТ Џинот, Велес), „Едвард Втори“ (НТ Џинот, Велес) ), „Собирачи на пердуви“ (Српско Народно Позориште, Нови Сад) и други, претставени на преку триесет референтни фестивали дома и во Р. Србија, Р. Бугарија, Р. БиХ, Р. Унгарија, Р. Кореа, Р. Романија и тн.

Добитник е на неколку награди и признанија, меѓу кои „Рациново признание“ за романот „Петтото годишно време“, признание за нова европска драма „Еуродрам“ за драмскиот текст „Помеѓу змејот и неговиот бес“, „Специјална награда за современ сценски израз на ИФАД Стоби 2017“ а Министерството за култура на Р. С. Македонија конкурсно го откупила неговиот текст „Госпоѓиците од Авињон“. За својата работа во книжевноста и театарот како млад уметник добитник е највисоко признание „Успешни млади“, кое го доделува Преседателот на Р. С. Македонија.

Од 2014 е драматург на Народен театар „Јордан Хаџи Константинов-Џинот“, Велес, а од 2020 е негов директор, селектор на Интернационалниот фестивал на античка драма „Стоби“ и професор на Унверзитетот „Еуропа Прима“ во Скопје, Р. С. Македонија.